ئەم وێنە نیگارییانە پێکهاتە سەرەکییەکانی کارگ نیشان دەدەن و بە گشتی بەشە جیاوازەکانی کوارگێکی نموونەییە.
دیارە ئەگەر بچینە نێو ووردەکارییەکانەوە، جیاوازیی زۆر بەرچاو دەکەوێت لە نێوان کوارگەکاندا بۆ وێنە کارگی وامان هەیە لە جیاتی پەڕ یا شانە پێکهاتەیەکی کونکونی هەیە وەک ئیسفەنج؛ هی وامان هەیە لە جیاتی پەڕ یا کون ددانی هەیە. هەروەها کوارگی وا هەیە قەدی نییە وەکوو پزلیک کە لەشێوەی تۆپێکی خڕ لەسەر زەوی دەردەکەوێت یان ئەو جۆرە قارچکانەی لە قەدی درەختەکان دەڕوێن و شێوەیان لە شێوەی سمی ئاژەڵ دەکات. قارچکی ئەوتۆیش هەیە کە کڵاوی نییە و لەبری کڵاو پێکهاتووە لە گۆیەکی ناڕێک و کونکون لەشێوەی مێشکی مرۆڤ و ناسراوە بە هەنگەشان یا مۆرێڵ. هەروەها هەندێک قارچک هەن کڵاوەکەیان تیسکی پێوەیە واتە توێژاڵی تەنک و باریک لە شێوەی موو لەسەر کڵاوەکە بەرزدەبنەوە.
