ویتلاكۆچێ، كارگی گه‌نمه‌شامی، دۆمبەڵانی گەنمەشامی، كه دومبه‌ڵانی مه‌كسیكی یا دۆمەڵانی گەنمەشامیشی پێده‌گوترێت، جۆرێكه له كه‌ڕوو. ئەو کەڕووە کە دەبێتە هۆکاری گۆڕانکاری لە گەنمەشامیدا بریتییە لە (ئوستیلاگۆ مەیدیس). واتە ویتلاکۆچێ بەدەست ناڕوێندرێت؛ به‌ڵكوو كه‌ڕوویه‌كی ده‌گمه‌نه و خۆی به ڕێكه‌وت له‌سه‌ر كوێچكه‌ی گه‌نمه‌شامیی پێگه‌یشتووی ئۆرگانیک دەگیرسێتەوە و لە کەشێکی لەبار و گونجاودا گەشەدەکات و ده‌ڕوێت. دووای باران بارینی زۆر، له‌سه‌ر كوێچكەی زۆرێک لە گه‌نمه‌شامییه‌كانی وڵاتی مەکسیک ده‌رده‌كه‌وێت. لە راستیدا کەڕووی ئوستیلاگۆ مەیدیس کەڕوویەکی بیماریزایە و گەنمەشامییەکە تووشی نەخۆشیی کوێڕوو دەکات و لاوازی دەکات یا گەشەی دەوەستێنێت. نەخۆشیی کوێروو لە گەنمیشدا هەیە و زیانێکی زۆر بە گەنم دەگەیەنێت. ئەمە جۆرە کەڕوویەکە لە پۆلی ئوستیلاگینۆمایسیتیس کە کەڕوویەکی مفتەژی\مشەخۆرە و بەگشتی ١٤٠٠ جۆر و ٧٠ جسنی جیاوازی هەیە.
نیشانە سەرەتاییەکانی تووشبوونی گەنمەشامی بەم نەخۆشییە بریتییە لەوە کە گەڵاکانی هێڵی زەردیان لێ پەیدا دەبێت و نەرم و شلییەکەیان نامێنێت. رەنگە سەوزەکەیان تۆخ دەبێت. بەرەکەیان خێراتر لە بەری ئاسایی پێدەگەن و کاتێک سەردەردەهێنن رەنگیان لە جیاتی زەرد، سورمەیی و خۆڵەمێشییە. بۆ پێشگیری کردن لە پەرەسەندنی ئەم کەڕووە، پێویستە هەر کاتێک کە هەستت بە هەبوونی کرد، یەک بە یەک ئەو سەرکە گەنمە شامییانە لێ بکەیتەوە و بیانسووتێنیت. هەروەها لە ئاودانی بارانی خۆ بپارێزیت؛ چونکە ئەمە رێگەیەکە بۆ بڵآوبوونەوەی. ساڵی دوواتریش ئەو زەوییە نابێ بکرێتەوە بە گەنمەشامی.
