بەگوێرەی وانستێکی زانستی کە لە بڵاڤۆکی نێونەتەوەیی کارگی دەرمانی دا لە ساڵی ٢٠٠١ بڵاو بووەتەوە، جۆرێک کارگ هەیە کە لە رووی زایەندییەوە ژن دەگەیەنێتە دوندی ئاسوودەیی.
وانستەکە لەلایەن دوو توێژەری ئەمریکایی بە ناوەکانی جۆن هۆڵیدەی و نۆح ساوڵ (John Holiday and Noah Soule) وە ئەنجام دراوە و لە ژمارەی ٣ی ساڵێ ٢٠٠١ی بڵاڤۆکەکەدا بڵاوکراوەتەوە؛ بەڵام لەم ڕۆژانەدا دەزگاکانی راگەیاندن تیشکیان خستووەتە سەر. لێکۆڵەرەکان دەڵێن پێشتر بیستبوومان کە لە نێو خەڵکی دورگەی هاوایی وتەیەکی ئەوتۆ لەسەر زمانانە، بەڵام کەس لە راستی و ناراستییەکەی دڵنیا نەبوو.
وەک لە وانستەکەدا ئاماژەی پێدراوە ئەم جۆرە قارچکە لەسەر پاشماوەی گووراسن (سووتماکی توواوە)ی گڕکانێک دەڕوێت کە تەمەنی لە نێوان ٦٠٠ تا ١٠٠٠ ساڵ زیاتر نابێت. ئەم قارچکە کە ڕەنگی نارنجییەکی کاڵە و لە خێزانی دیکتایۆفۆرا(Dictyophora)یە، ژن بە بۆنکردنی، ئارەزووی زایەندیی دەورووژێت و دەگاتە چڵووکی ئاسوودەیی. بۆ سەلماندنی ئەمەش توێژەرەکان تاقیکردنەوەیان لەسەر شازدە ژنی خۆبەخش کرد و ئەنجامی هەر شازدە لە ژنەکانیش ئەرێنی بوو. شەش لە ژنەکان بە تەواوی ئاسوودەبوون؛ بەڵام دە ژنەکانی تر کە هەرکامەیان بڕێکی کەمیان بۆن کردبوو، لێدانی دڵیان خێراتر بوو. شایانی باسە کە ئەم کوارگە هیچ کاریگەرییەک ناکاتە سەر پیاو و هەر پیاوێک بۆنی دەکات سەری بادەدات و ڕووی لێوەردەگێڕێت، چونکە هەست دەکات بۆنیکی لێوە دێت کە نزیکە لە بۆنی تەرسی کۆنی ئەسپ. شارەزایان دەڵێن تەنیا لێکۆڵینەوەیەک بەس نییە بۆ سەلماندنی ئەم بابەتە؛ و پێویستە بۆ دڵنیابوون و گەیشتن بە راستییەکی پشڕاستکراوە، وانست و توێژینەوەی قووڵتر و فراوانتر لەسەر ئەم بابەتە بکرێت.
 |
| ئەمە ناوی فالووسە، ورووژێنەری زایەندی نییە بەڵام لە هەمان خێزانە |
سەرچاوە:
- سایتی دەیلی مەیڵ
