 |
| ریسووی کەڕوو |
وێژەی زانستی وێنایی لەم سەردەمەدا کاتێ کە وەسف لە گەیشتنی مرۆڤ بە هاماج و هەسارەکانی وەک مانگ و مارس\مەریخ دەکات، ژیانی مرۆڤ لەسەر ئەو هەسارانە بە شێوازێکی ژوور ماکێنیزەکراو نیشان دەدات. بە وتەیەکی تر، کاتێک نووسەرێک لە ئەندێشەی خۆیدا ژیانی مرۆڤ دەگوازێتەوە بۆ فراوانیی هاماج و سەر مانگ و هەسارەکانی تر، بەجۆرێک وەسفی ئەم ژیانە دەکات کە ئیتر ئەوە چڵەپۆپەی گەشەی تەکنۆلۆژی و پیشەسازییە و هەموو رێگا وبان و ژینگەی ئەو هەسارانە بە کەرەستەی کانزایی و پیشەسازیی تازەی دەستی مرۆڤ دەڕازێنێتەوە. هەر لە کۆشک و خانووبەرەی سەیر و سەمەرەی کانزایی بریقەدارەوە بگرە تا دەگاتە ترومبێلی تیژڕۆی فڕۆک و رێگەی هەوایی و خۆراکی سەیر و سەمەرەی قوتووبەند و تاد.. بەڵام کاتێک مرۆڤ لەگەڵ راستییەکان لە سەر هەرد رووبەڕوو دەبێ، زۆر جار ئەم جۆرە وێژە زانستییانە دەبنە خەون و خەیاڵپڵاو و چیرۆکی شەوانی زستان.
کاتێک کە مرۆڤ بڕیار دەدات ژینگەی نوێ بۆ خۆی و ئایندەی خۆی لەسەر هەسارەکانی تر رۆبنێت، هیچ چارەی نییە جگە لە پەنابردن بۆ سروشت و سەوزایی. پەنابردن بۆ ئەو زیندەوەرە سەرەتاییانەی کە بە تێگەیشتنی مرۆڤ، سەرەتای ژیانیان لەسەر ئەم زەوییە داهێنا و ئەم هەسارەیەیان کردە ماڵی زیندەوەر و گیانەوەرەکان.
 |
| کەستەکی کەڕوویین کە لە ماوەی دوو هەفتەدا روواوە، قۆناغی دوای ئمە بریتییە دەبێ لە برژاندنی بۆ مەبەستی بەکارهێنانی بۆ دروستکردنی پێداویستیەکانی دانیشتن. |
بەگوێرەی سەرچاوەکانی ناسا، تێکۆشانێک هەیە بۆ دانانی بناخەی ژیان لە هاماج دا. یەکەم هەنگاوی ئەم تێکۆشانە بە ناردنی کەڕوو بۆ سەر مانگ و مەریخ دەسپێدەکات. ڵن رۆتسچایەڵد پشکنەری بەڕێوەبەر لە پرۆژە بەراییەکەدا دەڵێت، کارەکان بە پشتی کیسەڵ دەڕۆنە پێش بەڵام بە بەهایەکی زۆری ووزەیی. ژینگەیەکی نەریتی لەسەر مانگ و مارس دروستدەکرێ بە روواندنی تۆخمارەی کەڕوو لە ژێر خاکەکەیاندا. زانایان بە ئاگادار بوون لە خەسڵەت و تایبەتمەندییەکانی کەڕوو، بەم قەناعەتە گەیشتوون کە کار لەسەر کەڕوو بکرێت و بنێردرێت بۆ سەر هەسارەکانی تر تا رێگە خۆش بکات بۆ دامەزراندنی سەرەتاکانی ژیان. جارێ روون نییە ئەم هەنگاوە چەندە سەرکەوتوو دەبێ، بەڵام زۆر گرنگە کە گەورەترین هێز و تەکنۆلۆژیا و پیشەسازی و دەوڵەمەندترین وڵاتی دنیا لە دوای پتر لە نیو سەدە هاتوچۆ بە پێشکەوتووترین کەرەستەی میکانیکی و ووزەیی و دیجیتالی بۆ هاماج، لە روواندنی کەڕووەوە دەست بکات بە ئاوەدانکردنەوەی هەسارەکانی تر و دانانی بناخەکانی ژیان تیایاندا.
پرۆژەکەی ناسا ناوی لێنراوە (پرۆژەی کەڕووەبیناسازی) و فراوانە بەڵام هەنگاوەکانی زۆر بە ئارامی و هێوری جێبەجێدەکرێن. پرۆژەکە وا پێشگریمانە کراوە کە کەستەکی سووکی کەڕوویین ئامادە بکرێن و رەوانەی هەسارەکان بکرێن؛ هەر کە لەوێ دابەزینە سەر خاک ئاو دەکرێ بە سەریاندا و لەوێ دەسدەکەن بە رووان و گەشەکردن و تەواوی ئەو رووبەرەی بۆیان دیاریکراوە دادەپۆشن و بەمجۆرە ژینگە ئامادە دەکەن تا ئەو کاتەی مرۆڤ دەگاتە ئەوێ. ئەم پرۆژەیە لەلایەن پرۆگرامی چەمکە پێشکەوتووە نۆژەنەکانی سەر بە ناساوە پشتگیری دەکرێت و بەشێکە لەو بووارە کە ناسراوە بە ژیانزانیی راستەقینە.
 |
| خشتی کەڕوویین کە لە ئاردەدار و پاشماوەکانی باخچە دروسکراوە و وەک کەرەستەی بیناسازی بەکاردەهێنرێت؛ و لە پرۆژەکەی ناسادا سوودی لێ وەردەگیرێت بۆ بیناسازی لەسەر مەریخ |
سەرچاوە:
No comments:
Post a Comment