ئیرەج مۆرادی
تالمە جۆرێکە لە پەنیر کە شوانەکان لە دەشت کاتێک برسییان دەبوو و حەزیان دەکرد پەنیر بخۆن دروستیان دەکرد. تالمە لە شیری مەڕ یان بزن دروست دەکرا. شوانەکان مەڕێک یان بزنێکیان دەدۆشی و دەچوون هەنجیرێکی سەوز (کاڵ) یان لێدەکردەوە لە دارەکان و یەک دڵۆپ لە شیرەی هەنجیرەکەیان دەچۆڕاندە ناو تاسە شیرەکەوە. پاش کەمێک شیرەکە دەبوو بە پەنیر. ئەو جۆرە پەنیرە لە کوردەواری بە پەنیری تالمە ناسراوە. ئەگەر هەنجیری کاڵ دەست نەکەوتبایە گەڵایەک یان هەنجیرێکی پێگەیشتوویان بەکار دەهێنا بۆ دەستکەوتنی ئاوە شیریەکەی هەنجیر. دەبێت شیرەکە ڕاستەوخۆ لە مەڕەکە بدۆشرێت و شیرەی هەنجیرەکەی تێ بکرێت؛ چونکە گرنگە گەرمی شیرەکە لە نزیکی ٣٠ پلەی سەدی بێت ئەویش پلەی گەرمی لەشی مەڕ و بزنە. ئەگەر دواکەوت دەبێت شیرەکە گەرم بکرێتەوە؛ و ئەگەر ئاگر خۆش کرابوو باشترە شیرەکە لە ٣٠ پلە گەرمتر بکرێت. نزیکەی ٧٠ تا ٨٠ پلەی سەدی، خێراتر پەنیرەکە دروست دەکات.
ئەگەر رێژەیەکی زۆر لە شیرەی هەنجیر تێکەڵی شیرەکە بکرێت، تامی پەنیرەکە تاڵ دەکات. بۆ چوار لیوان شیر پێویستیت بە پێنج دڵۆپ هەیە.
هەندێک جار شوانەکان ئەو شیرە هەنجیرەیان لە ناو جامێکی قوڕ کۆ دەکردەوە لە بەهاران و وشکیان دەکرد؛ پاشان دەیان هاڕی بۆ بەکارهێنانی لەو شوێنانەی کە دار هەنجیری لێ دەست ناکەوت.
پەنیری دەڵەمە یان تالمە تەنها بە ئاوی هەنجیر دروست ناکرێت. هەندێک گیای دیکەش بەکار دێن؛ بەڵام هەندێکیان پەنیرەکەیان زۆر تال دەردەچێت؛ لەبەر تاڵی ئاوەکەیان وەک شیری ڕووەکی خۆشیلک، و هەندێکیشیان تامی پەنیرەکەیان تاڵ نابێت وەکو گیا دەڵەمە.
ئەم جۆرە پەنیرە لە زۆر کۆنەوە ناسراوە. لە نووسراوە کۆنەکانی یۆنانیدا باسی کراوە کە سەربازە ڕۆمیەکان و هەروەها خێڵە کۆچەرە جووەکان دەربارەی ئەم پەنیرە لە پەڕتووکەکانیان دا شتیان نووسیوە.
No comments:
Post a Comment