کاتی ڕووانی بریتییە لە سەرەتا تا کۆتایی پاییز. تیرەی کڵاوەکەی ٧٥ تا ١٥٠ میلیمەتر دەبێت. گۆشتنە و سەرەتا هێلکەییە بەڵام دوواتر لەگەڵ کرانەوەی پتردا، هێشتا بەقۆقزی دەمێنێتەوە. رەنگی سپیواشە، لووسە و ریشاڵدارە. سەرەنجام نزیکەی تەواو پان و تەخت دەبێت. گۆشتەکەی سپییە و رەنگی ناگۆڕێت.
شیپەڕەکانی بە قەدەوە نەنووساون و ئازادن. ئەستوور و شاڵن و رەنگیان قەیماغییە. ٨ تا ١٢ میلیمەتر دەبن.
قەدەکەی ١٢٠ تا ٢١٠ میلیمەتر درێژ دەبێت و تیرەی ئەستوورییەکەی ٢٥ تا ٤٥ میلیمەتر دەبێت. رەنگی سپییە، پتەوە و لای سەرەوەی باریکترە لە لای خوارەوە. شێوەکەی پتر زوڕناییە نەک سەرکی. هەروەها ئەڵقەیەکیشی لای سەرووی قەدەکەوە هەیە. پەردەکەی رەنگی گڵەسووری بۆ قاوەیی سووروەشە.
ئەمانیتا ماکزیما لە ووڵاتانی کەنار مێدیتەرانە وەک فرانسە، سپانیا و ئیتاڵیا دەبینرێت و بە شێوەی هاوژینی لەگەڵ بەڕوو و گەڵادەرزیلەییەکاندا دەڕوێت؛ و وا باوەڕدەکرێت کە کارگێکی گەرمیشەیدا بێت. چەند دانەرێک باسیان لەمە کردووە کە ئەمانیتا ماکزیما حەزی لە خاکی گەچی و قسڵینە و لەو شوێنانە دەڕوێت.
لە بنی قەدەکەیدا کاسەی هەیە و رەنگی گڵەسوورییە. زۆر جار لەگەڵ ئەمانیتا ئۆڤۆیدی هاوێرناکرێت. زۆر لەیەکتری دەچن و لە هەمان ژینگەدا دەڕوێن.
ئەمانیات پرۆکزیما چەند جار وەک ژەهراوی باسی کراوە؛ و نیشانەکانی ژەهراویکردنی وەک هی کارگی ئەمانیتا سمیتیانایە. ژەهراویبوون بەم قارچکە یەکەم جار ساڵی ١٩٦٨ تۆمار کراوە. باس لەوە کراوە کە گورچیلە پەکدەخات بەڵام هیچ راپۆرتێک سەبارەت بە مردن بەم کوارگە نەدراوە.
سەرچاوە
